0:00
/
1ܘܐ݇ܬܹܐܠܗܘܿܢ ܠܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ ܠܐܲܬܪܵܐ ܕܓܸܕܪ̈ܵܝܹܐ. 2ܘܟܲܕ ܦܠܸܛܠܹܗ ܡ̣ܢ ܓܵܡܝܼ: ܕܲܪܣܵܥܲܬ ܬܦܸܩܠܹܗ ܒܝܹܗ ܡ̣ܢ ܒܹܝܬ ܩܒ̣ܘܼܪܹ̈ܐ ܚܲܕَ ܐ݇ܢܫܵܐ ܕܐܝܼܬ ܗ݇ܘܵܐ ܒܝܹܗ ܪܘܼܚܵܐ ܛܲܡܹܐܐ. 3ܘܥܵܡܸܪ ܗ݇ܘܵܐ ܓܵܘ ܒܹܝܬ ܩܒ̣ܘܼܪܹ̈ܐ. ܘܐܘܼܦ ܒܫܹܫܠܝܵܬܹ̈ܐ ܐ݇ܢܵܫܵܐ ܠܹܐ ܡܵܨܹܐ ܗ݇ܘܵܐ ܠܹܐܣܵܪܹܗ. 4ܣܵܒܵܒ ܪܵܒܵܐ ܓܵܗܹ̈ܐ ܒܩܵܘܕܹ̈ܐ ܘܒܫܹܫܸܠܝܵܬܹ̈ܐ ܦܵܐܹܫ ܗ݇ܘܵܐ ܐَܣܝܼܪܵܐ: ܘܫܹܫܸܠܝܵܬܹ̈ܐ ܟܹܐ ܩܲܛܸܥ ܗ݇ܘܵܐ: ܘܩܵܘܕܹ̈ܐ ܬܵܒܸܪ ܗ݇ܘܵܐ: ܘܐ݇ܢܵܫܵܐ ܠܹܐ ܡܵܨܹܐ ܗ݇ܘܵܐ ܠܙܲܒܛܘܼܢܹܗ. 5ܘܒܟܠ ܙܲܒ̣ܢܵܐ: ܒܠܲܝܠܹܐ ܘܒܐܝܼܡܵܡܵܐ: ܓܵܘ ܒܹܝܬ ܩܒ̣ܘܼܪܹ̈ܐ ܘܓܵܘ ܛܘܼܪ̈ܵܢܹܐ: ܡܲܩܘܘܼܚܹܐ ܗ݇ܘܵܐ: ܘܕܲܪܒܘܼܢܹܐ ܓܵܢܹܗ ܒܟܹܐܦܹ̈ܐ. 6ܘܟܲܕ ܚܙܹܐܠܹܗ ܠܝܼܫܘܿܥ ܡ̣ܢ ܪܸܚܩܵܐ: ܪܚܸܛܠܹܗ ܣܓܸܕܠܹܗ ܐܸܠܹܗ. 7ܘܡܘܼܩܘܸܚܠܹܗ ܒܩܵܠܵܐ ܪܵܡܵܐ ܘܐَܡܝܼܪܹܗ: ܡܲܐܠܘܼܟܼ ܡܸܢܝܼ؛ ܝܼܫܘܿܥ؛ ܒܪܘܿܢܹܗ ܕܐܲܠܵܗܵܐ ܥܸܠܵܝܵܐ؛ ܡܵܘܡܘܼܝܹܐ ܝܼܘܸܢ ܒܝܼܘܼܟܼ ܒܐܲܠܵܗܵܐ: ܕܠܵܐ ܓ̰ܲܢܓ̰ܸܪܸܬ ܠܝܼ. 8ܣܵܒܵܒ ܕܐَܡܝܼܪܹܗ ܐܸܠܹܗ: ܦܠܘܿܛ ܡ̣ܢ ܐ݇ܢܵܫܵܐ: ܪܘܼܚܵܐ ܛܲܡܹܐܐ. 9ܘܒܘܼܩܸܪܹܗ ܡܸܢܹܗ: ܡܘܼܕܝܼ ܝܠܹܗ ܫܸܡܘܼܟ: ܘܐܵܡܸܪ ܐܸܠܹܗ: ܠܸܓ̣ܝܘܿܢ ܝܼܠܹܗ ܫܸܡܝܼ: ܣܵܒܵܒ ܪܵܒܵܐ ܝܘܵܚ. 10ܘܦܘܼܪܦܸܠܹܗ ܒܝܹܗ ܪܵܒܵܐ ܕܠܵܐ ܫܵܕܸܪܗܘܿܢ ܠܒܲܕܲܪ ܡ̣ܢ ܐܲܬܪܵܐ. 11ܐܝܼܢܵܐ ܐܝܼܬ ܗ݇ܘܵܐ ܬܵܡܵܐ ܠܟܸܣ ܛܘܼܪܵܐ ܒܲܩܪܵܐ ܓܘܼܪܬܵܐ ܕܚܙܘܼܪܹ̈ܐ ܒܸܪ̈ܥܵܝܵܐ. 12ܘܦܘܼܪܦܸܠܗܘܿܢ ܒܝܹܗ: ܒܹܐܡܵܪܵܐ: ܫܵܕܸܪܲܢ ܠܐܲܢܹܐ ܚܙܘܼܪܹ̈ܐ ܕܥܵܒܼܪܲܚ ܒܝܼܵܝܗܝ. 13ܘܝܘܼܗَܒܼܸܠܹܗ ܕܲܣܬܘܼܪ ܐܸܠܵܝܗܝ. ܘܦܠܸܛܠܗܘܿܢ ܐܵܢܝܼ ܪ̈ܘܼܚܹܐ ܛܲܡܹ̈ܐܐ ܘܥܒܼܸܪܗܘܿܢ ܓܵܘ ܚܙܘܼܪܹ̈ܐ. ܘܪܚܸܛܠܵܗ̇ ܗ̇ܝ ܒܲܩܪܵܐ ܠܩܵܝܵܐ ܠܐܸܠܬܸܚ ܘܢܦܸܠܵܗ̇ ܒܝܵܡܵܐ: ܐܲܝܟܼ ܬܪܹܝ ܐܲܠܦܹ̈ܐ: ܘܚܢܸܩܠܗܘܿܢ ܒܝܵܡܵܐ. 14ܘܐܵܢܝܼ ܕܡܲܪܥܘܼܝܹܐ ܗ݇ܘܵܘ ܠܚܙܘܼܪܹ̈ܐ ܥܪܸܩܠܗܘܿܢ ܘܡܘܼܕܸܥܠܗܘܿܢ ܓܵܘ ܡܕܝܼܢَܬܵܐ ܘܐܘܼܦ ܓܵܘ ܡܵܬܘܵܬܹ̈ܐ. ܘܦܠܸܛܠܗܘܿܢ ܠܸܚܙܵܝܵܐ ܡܸܢܕܝܼ ܕܗَܘܹܐܠܹܗ. 15ܘܐ݇ܬܹܐܠܗܘܿܢ ܠܟܸܣ ܝܼܫܘܿܥ: ܘܚܙܹܐܠܗܘܿܢ ܠܕܲܝܘܵܢܵܐ ܝܬܝܼܒ̣ܵܐ: ܘܠܒ̣ܝܼܫܵܐ ܘܡܵܪܹܐ ܐܵܕܵܒ: ܗ̇ܘ ܕܐܝܼܬ ܗ݇ܘܵܐ ܒܝܹܗ ܠܸܓ̣ܝܘܿܢ: ܘܙܕܸܥܠܗܘܿܢ. 16ܘܗܘܼܩܹܠܗܘܿܢ ܐܸܠܵܝܗܝ ܐܵܢܝܼ ܕܚܙܹܐܠܗܘܿܢ: ܕܵܐܟ̣ܝܼ ܗَܘܹܐ ܠܵܗ̇ ܠܕܲܝܘܵܢܵܐ: ܘܐܘܼܦ ܥܲܠ ܕܐܵܢܝܼ ܚܙܘܼܪܹ̈ܐ. 17ܘܫܘܼܪܹܠܗܘܿܢ ܠܦܲܪܦܘܼܠܹܐ ܒܝܹܗ ܕܐܵܙܸܠ ܗ݇ܘܵܐ ܡ̣ܢ ܬܸܚܘܼܒܵܝܗܝ. 18ܘܟܲܕ ܐ݇ܣܸܩܠܹܗ ܠܓܵܡܝܼ: ܦܘܼܪܦܸܠܹܗ ܒܝܹܗ ܗ̇ܘ ܕܝܼܗ݇ܘܵܐ ܕܲܝܘܵܢܵܐ ܕܗܵܘܹܐ ܗ݇ܘܵܐ ܥܲܡܹܗ. 19ܘܠܵܐ ܫܒܸܩܠܹܗ: ܐܸܠܵܐ ܐَܡܝܼܪܹܗ ܐܸܠܹܗ: ܙܹܠَܐ ܠܒܲܝܬܘܼܟ ܠܟܸܣ ܐܢܵܫܘܼ̈ܟ: ܘܗܵܩܝܼ ܠܗ݇ܘܿܢ ܕܵܐܟ̣ܝܼ ܡܸܢܕܝܼ ܥܒܸܕܠܹܗ ܐܸܠܘܼܟܼ ܡܵܪܝܵܐ: ܘܕܪܘܼܚܸܡܠܹܗ ܥܲܠܘܼܟܼ. 20ܘܐَܙܸܠܹܗ ܘܫܘܼܪܹܐܠܹܗ ܠܡܲܟܪܘܼܙܹܐ ܒܥܸܣܪܲܬ ܡܕܝܼܢܵܬܵܐ ܡܸܢܕܝܼ ܕܥܒܸܕܠܹܗ ܐܸܠܹܗ ܝܼܫܘܿܥ. ܘܟܠܵܝܗܝ ܥܵܓ̰ܒܝܼ ܗ݇ܘܵܘ. 21ܘܟܲܕ ܥܒܸܪܹܗ ܡܸܢَܕܪܸܫَ ܝܼܫܘܿܥ ܒܓܵܡܝܼ ܠܗ̇ܘ ܡܲܪܙܵܐ ܐ݇ܚܹܪ݇ܢܵܐ: ܓ̰ܡܸܥܠܗܘܿܢ ܥܲܠܘܼܗܝ ܟܸܢܫܹ̈ܐ ܪܵܒܵܐ: ܟܲܕ ܥܲܠ ܣܸܦܬܵܐ ܕܝܵܡܵܐ ܗ݇ܘܵܐ. 22ܘܐَܬܹܐܠܹܗ ܚܲܕَ ܡ̣ܢ ܓܘܼܪ̈ܵܢܹܐ ܕܟܢܘܼܫܬܵܐ: ܕܫܸܡܹܗ ܝܘܿܐܵܪܵܫ: ܘܟܲܕ ܚܙܹܐܠܹܗ: ܢܦܸܠܹܗ ܠܟܸܣ ܐܲܩܠܘܼ̈ܗܝ. 23ܘܦܘܼܪܦܸܠܹܗ ܒܝܹܗ ܪܵܒܵܐ: ܘܐܵܡܸܪ ܐܸܠܹܗ: ܒܪܵܬܝܼ ܙܥܘܿܪܬܵܐ ܩܵܕَܡ ܡܵܘܬܵܐ ܝ݇ܠܵܗ̇: ܬܵܐ ܡܲܬܸܒ̣ ܐܝܼܕܘܼ̈ܟ ܥܲܠܘܼܗ̇: ܕܦܵܝܫܵܐ ܒܘܼܣܸܡܬܵܐ: ܘܚܲܝܵܐ. 24ܘܐَܙܸܠܹܗ ܥܲܡܹܗ: ܘܟܸܢܫܵܐ ܪܵܒܵܐ ܒܹܐܙܵܠܵܐ ܗ݇ܘܵܐ ܒܵܬَܪܹܗ: ܘܒܸܚܠܵܨܵܐ ܗ݇ܘܵܐ ܐܸܠܹܗ. 25ܘܚܕܵܐ ܒܲܟ̣ܬܵܐ ܕܝܼܗ݇ܘܵܐ ܒܡܲܓ̰ܪܵܝܬܵܐ ܕܕܸܡܵܐ ܬܪܸܥܣܲܪ ܫܸܢܹ̈ܐ. 26ܘܪܵܒܵܐ ܩܘܼܒܸܠܬܵܐ ܗ݇ܘܵܐ ܡ̣ܢ ܪܵܒܵܐ ܗܲܟܝܼܡܹ̈ܐ: ܘܚܘܼܪܸܓ̰ܬܵܐ ܗ݇ܘܵܐ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܵܗ̇: ܘܡܸܢܕܝܼ ܠܵܐ ܗَܘܹܐܠܹܗ ܝ݇ܠܵܗ̇ ܦܲܝܕܵܐ: ܐܸܠܵܐ ܐܘܼܦ ܙܵܘܕܵܐ ܦܸܫܠܵܗ̇ ܡܘܼܠܝܸܨܬܵܐ. 27ܟܲܕ ܫܡܸܥܠܵܗ̇ ܒܘܼܬ ܕܝܼܫܘܿܥ: ܐَܬܹܐܠܵܗ̇ ܒܟܸܢܫܵܐ ܡ̣ܢ ܒܵܬَܪܹܗ: ܘܕܩܸܪܵܗ̇ ܒܠܒܸܫܬܹܗ. 28ܣܵܒܵܒ ܕܐ݇ܡܸܪܵܗ̇: ܐܘܼܦ ܐܸܢ ܒܠܒܸܫܬܹܗ ܕܵܩܪܵܢ ܐܢܵܐ: ܒܸܬ ܚܲܝܵܢ. 29ܘܕܲܪܣܵܥܲܬ ܒܪܸܙܠܵܗ̇ ܥܲܝܢܵܐ ܕܕܸܡܘܼܗ̇: ܘܪܥܸܫܠܵܗ̇ ܒܦܲܓ̣ܪܘܼܗ̇ ܕܒܣܸܡܠܵܗ̇ ܡ̣ܢ ܡܚܘܿܬܘܼܗ̇. 30ܘܝܼܫܘܿܥ ܕܲܪܣܵܥܲܬ ܝܕܸܥܠܹܗ ܒܓܵܢܹܗ ܕܚܲܝܠܵܐ ܦܠܸܛܗ ܡܸܢܹܗ: ܘܕܸܪܹܗ ܓܵܘ ܟܸܢܫܵܐ ܘܐَܡܝܼܪܹܗ: ܡܵܢܝܼ ܕܩܸܪܹܗ ܒܠܒܸܫܬܝܼ. 31ܐَܡܸܪܗܘܿܢ ܐܸܠܹܗ ܬܲܠܡܝܼܕܘܼ̈ܗܝ: ܒܸܚܙܵܝܵܐ ܝܘܸܬ ܠܟܸܢܫܵܐ ܒܸܚܠܵܨܘܼܟ: ܘܒܹܐܡܵܪܵܐ ܝܘܸܬ: ܡܵܢܝܼ ܕܩܸܪܹܗ ܒܝܼܝܼ. 32ܘܒܸܚܝܵܪܵܐ ܗ݇ܘܵܐ ܕܚܵܙܹܐ ܠܗ̇ܝ ܕܥܒܸܕܠܵܗ̇ ܐܵܗܵܐ. 33ܐܝܼܢܵܐ ܒܲܟ̣ܬܵܐ: ܟܲܕ ܒܸܙܕܵܥܝܵܐ ܘܪܲܬܪܘܼܬܹܐ: ܒܝܼܕܵܥܝܵܐ ܡܸܢܕܝܼ ܕܗَܘܹܐܠܹܗ ܐܸܠܵܗ̇: ܐَܬܹܐܠܵܗ̇ ܢܦܸܠܵܗ̇ ܩܵܕَܡܘܼܗܝ: ܘܐَܡܝܼܪܵܗ̇ ܐܸܠܹܗ ܟܠܵܗ̇ ܣܲܪܲܣܬܘܼܬܵܐ. 34ܘܗ̇ܘ ܐَܡܝܼܪܹܗ ܐܸܠܵܗ̇: ܒܪܵܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܙܹܠَܐܝ ܒܫܠܵܡܵܐ: ܘܗܵܘܝܲܬܝ ܒܘܼܣܸܡܬܵܐ ܡ̣ܢ ܡܚܘܿܬܵܟ̣ܝ. 35ܘܗܵܠܵܐ ܗ̇ܘ ܗܲܡܙܘܼܡܹܐ: ܐ݇ܬܹܐܠܗܘܿܢ ܡ̣ܢ ܒܲܝܬܵܐ ܕܓܘܼܪܵܐ ܕܟܢܘܼܫܬܵܐ ܘܐܵܡܪܝܼ: ܒܪܵܬܘܼܟ ܡܝܼܬܬܵܐ ܝ݇ܠܵܗ̇: ܐ݇ܚܹܪ݇ܢܵܐ ܩܵܡܘܿܕܝܼ ܙܲܗܡܲܬ ܒܝܼܵܗَܒ̣ܵܐ ܝܘܸܬ ܠܡܲܠܦܵܢܵܐ. 36ܐܝܼܢܵܐ ܝܼܫܘܿܥ ܟܲܕ ܠܵܐ ܨܸܬܠܹܗ ܠܗܹܡܸܙܡܵܢ ܕܐَܡܸܪܗܘܿܢ: ܐَܡܝܼܪܹܗ ܠܗ̇ܘ ܓܘܼܪܵܐ ܕܟܢܘܼܫܬܵܐ: ܠܵܐ ܙܵܕܸܥܬ: ܐܲܚܟ̰ܝܼ ܗܲܡܸܢ. 37ܘܠܵܐ ܫܒܸܩܠܹܗ ܠܐ݇ܢܵܫܵܐ ܕܐܵܙܸܠ ܥܲܡܹܗ: ܫܒ̣ܘܿܩ ܡ̣ܢ ܟܹܐܦܵܐ: ܘܝܲܥܩܘܿܒ̣: ܘܝܘܿܚܲܢܵܢ ܐܵܚܘܿܢܹܗ ܕܝܲܥܩܘܿܒ̣. 38ܘܐ݇ܬܹܐܠܗܘܿܢ ܠܒܲܝܬܵܐ ܕܗ̇ܘ ܓܘܼܪܵܐ ܕܟܢܘܼܫܬܵܐ: ܘܚܙܹܐܠܹܗ ܫܓ̣ܘܼܫܝܵܐ: ܘܐܵܢܝܼ ܕܒܸܒܟ̣ܵܝܵܐ ܘܒܸܥܒ̣ܵܕܵܐ ܬܵܙܝܼ ܪܵܒܵܐ. 39ܘܟܲܕ ܥܒܼܸܪܹܗ ܐَܡܝܼܪܹܗ ܐܸܠܵܝܗܝ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܫܓ̣ܘܼܫܝܵܐ ܘܒܸܒܟ̣ܵܝܵܐ: ܒܪܵܬܵܐ ܠܹܐ ܝ݇ܠܵܗ̇ ܡܝܼܬܬܵܐ: ܐܸܠܵܐ ܕܡܝܼܟ̣ܬܵܐ ܝ݇ܠܵܗ̇. 40ܘܓܚܸܟܠܗܘܿܢ ܒܝܹܗ. ܐܝܼܢܵܐ ܗ̇ܘ ܦܘܼܠܸܛܠܹܗ ܠܟܠܵܝܗܝ: ܘܠܘܼܒܸܠܹܗ ܠܒܵܒܵܗ̇ ܕܒܪܵܬܵܐ ܘܠܝܸܡܵܗ̇ ܘܠܐܵܢܝܼ ܕܥܲܡܹܗ: ܘܥܒܼܸܪܹܗ ܠܐܲܝܟܵܐ ܕܝܼܗ݇ܘܵܐ ܒܪܵܬܵܐ. 41ܘܕܒܸܩܠܹܗ ܒܐܝܼܕܵܗ̇ ܕܒܪܵܬܵܐ: ܘܐَܡܝܼܪܹܗ ܐܸܠܵܗ̇: ܛܠܝܼܬܵܐ ܩܘܼܡ݇ܝ: ܕܦܝܵܫܵܐ ܝ݇ܠܵܗ̇ ܦܘܼܫܸܩܬܵܐ: ܒܪܵܬܵܐ: ܐܸܠܵܟ̣ܝ ܒܹܐܡܵܪܵܐ ܝܘܸܢ: ܩܘܼܡَܝ. 42ܘܕܲܪܣܵܥܲܬ ܩܸܡܠܵܗ̇ ܒܪܵܬܵܐ: ܘܚܕܸܪܵܗ̇: ܣܵܒܵܒ ܕܒܲܪܬ݇ ܬܪܸܥܣܲܪ ܫܸܢܹ̈ܐ ܗ݇ܘܵܐ. ܘܥܘܼܓ̰ܸܒܠܗܘܿܢ ܥܘܼܓ̰ܵܒܵܐ ܓܘܼܪܵܐ. 43ܘܦܘܼܩܕܵܝܠܹܗ ܪܵܒܵܐ ܕܐ݇ܢܵܫܵܐ ܠܵܐ ܝܵܕܸܥ ܐܵܗܵܐ. ܘܐَܡܝܼܪܹܗ ܕܝܵܗَܒ̣ܝܼ ܠܵܗ̇ ܠܹܐܟ̣ܵܠܵܐ.